ପୁପୁଲ ଭୂୟାଁ (Pupul Bhuyan) ଜଣେ ଓଡ଼ିଆ କଥାଚିତ୍ର ଅଭିନେତ୍ରୀ ଏବଂ ଦୂରଦର୍ଶନ ଉପସ୍ଥାପିକା । ସେ ୨୦୧୩ ମସିହାରେ ଓଡ଼ିଆ କଥାଚିତ୍ର କାଉଁରୀ କନ୍ୟା ଜରିଆରେ ଓଡ଼ିଆ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ଏହାପରେ ପୁପୁଲ ଓଡ଼ିଆ ଦୂରଦର୍ଶନ ବିଭିନ୍ନ କାର୍ଯ୍ୟକ୍ରମରେ ଉପସ୍ଥାପିକା ଭାବରେ କାର୍ଯ୍ୟ କରିଥିଲେ । ୨୦୧୮ ମସିହାରେ ସେ ଅପେରା ମିସେସ୍ ଇଣ୍ଡିଆ ପ୍ରତିଯୋଗୀତାରେ ବିଜୟୀନି ହୋଇଥିଲେ ।

ପୁପୁଲ ୧୯୯୨ ମସିହାର ଫେବୃଆରୀ ୨୩ ତାରିଖରେ କେନ୍ଦୁଝର ଜିଲ୍ଲାର ସଇଁକୁଳଠାରେ ଜନ୍ମଗ୍ରହଣ କରିଥିଲେ । ସେ ଭୁବନେଶ୍ୱର ସ୍ଥିତ ବକ୍ସି ଜଗବନ୍ଧୁ ବିଦ୍ୟାଧର କଲେଜରୁ ସ୍ଥାତନ କରିଥିଲେ ।

ପୁପୁଲ ୨୦୧୩ ମସିହାରେ ଓଡ଼ିଆ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ସେ ସୋମ୍ୟ ରଞ୍ଜନ ସାହୁଙ୍କ ନିର୍ଦ୍ଦେଶକ ପ୍ରଥମ ଓଡ଼ିଆ 3D ଚଳଚ୍ଚିତ୍ର କାଉଁରୀ କନ୍ୟା ଜରିଆରେ ଓଡ଼ିଆ କଥାଚିତ୍ର ଜଗତରେ ନାୟିକା ଭାବରେ ଅଭିନୟ ଆରମ୍ଭ କରିଥିଲେ । ଏହି କଥାଚିତ୍ର ପାଇଁ ତାଙ୍କୁ ରୂପନଗରୀ ମାୟାନଗରୀ ପୁରସ୍କାର ଉତ୍ସବ ଏବଂ ସୋ ଟାଇମ୍ ପୁରସ୍କାର ଉତ୍ସବରେ ଶ୍ରେଷ୍ଠ ନବାଗତା ପୁରସ୍କାର ମିଳିଥିଲା ।

ପୁପୁଲ ଓଡ଼ିଆ ଦୂରଦର୍ଶନର ବିଭିନ୍ନ କାର୍ଯ୍ୟକ୍ରମରେ ଉପସ୍ଥାପିକା ଭାବରେ ମଧ୍ୟ କାର୍ଯ୍ୟ କରିଛନ୍ତି । ସେ ଓ ଟିଭିର ଇ-ନ୍ୟୁଜ୍, ଏ-ଗସିପ୍, ଟେଲି ଟ୍ରାଭେଲ୍ ଆଦି କାର୍ଯ୍ୟକ୍ରମରେ ଉପସ୍ଥାପନା କରିଥିଲେ । ସେ ଏମ୍.ବି.ସି ଟିଭିରେ ଦ ରିଭ୍ୟୁ ସୋ, ତରଙ୍ଗ ଟିଭିରେ ଆମ ରୋଷେଇ ଘର, ଜିତ ଓଡ଼ିଶା ଜିତ, ଇ ଟିଭି ଓଡ଼ିଆରେ ଆପଣଙ୍କ ପସନ୍ଦ, ସାର୍ଥକ ଟିଭିରେ ସ୍ୱର ଓଡ଼ିଶାର, ମୁଁ ବି ହିରୋଇନ ହେବି, ସରେଗାମାପା ଲିଟିଲ୍ ଚାମ୍ପସ୍ ଆଦି କାର୍ଯ୍ୟକ୍ରମରେ ଉପସ୍ଥାପିକା ଭାବରେ କାର୍ଯ୍ୟ କରିଥିଲେ ।

ପୁପୁଲଙ୍କର ଅନ୍ୟ ଏକ ଚଳଚ୍ଚିତ୍ର ଅନୁଭବ- ଏ ଲଭର୍‌ବୟର ନିର୍ମାଣ ଚାଲିଛି । ଏଥିରେ ପୁପୁଲଙ୍କ ସ‌ହ ନାୟକ ଭୂମିକାରେ ଅଭିନୟ କରୁଛନ୍ତି ସୂରଜ କୁମାର । ଚଳଚ୍ଚିତ୍ରର ନିର୍ଦ୍ଦେଶନା ଦେଉଛନ୍ତି ସରୋଜ ବାରିକ ।