ପ୍ରଜ୍ଞା ପରିସ୍ମିତା ହୋତା (ଜନ୍ମ: ୨୦ ଡିସେମ୍ବର ୧୯୯୭), ଜଣେ ଓଡ଼ିଆ କଣ୍ଠଶିଳ୍ପୀ ଯିଏକି ପ୍ରଜ୍ଞା ହୋତା ନାମରେ ଓଡ଼ିଆ କଥାଚିତ୍ର ଜଗତରେ ପରିଚିତ । ସେ ଓଡ଼ିଆ କଥାଚିତ୍ର ଜଗତରେ ଚଳଚ୍ଚିତ୍ରରେ ଏବଂ କିଛି ଆଲବମ୍‌ରେ କଣ୍ଠଦାନ କରିଛନ୍ତି । ସେ ୨୦୧୫ ମସିହାରେ ପ୍ରଜ୍ଞା ତରଙ୍ଗ ଟିଭିଦ୍ୱାରା ଆୟୋଜିତ କାର୍ଯ୍ୟକ୍ରମ ଭଏସ୍ ଅଫ୍ ଓଡ଼ିଶାର ୩ୟ ସଂସ୍କରଣର ବିଜେତା ହୋଇଥିଲେ ।

ପ୍ରଜ୍ଞା ହୋତା ୨୦ ଡିସେମ୍ବର ୧୯୯୭ରେ ଓଡ଼ିଶାର ଅନୁଗୋଳଠାର ଜନ୍ମଗ୍ରହଣ କରିଥିଲେ । ସେ ତାଙ୍କର ପାଠପଢ଼ା ଅନୁଗୋଳର ରୋଟାରୀ ପବ୍ଲିକ୍ ସ୍କୁଲରୁ ଆରମ୍ଭ କରିଥିଲେ । ଏହାପରେ ସେ ୨୦୧୨ରେ ରୋଟାରୀ ହାଇସ୍କୁଲରୁ ମାଟ୍ରିକ୍ ପାଶ୍ କରିବା ପରେ ତାଳଚେରର ଡି.ଏ.ଭି. ପବ୍ଲିକ୍ ସ୍କୁଲରୁ ଦ୍ୱାଦଶ ଶ୍ରେଣୀ ପାଠପଢ଼ା ଶେଷ କରି ରେଭେନ୍ସା ବିଶ୍ଵବିଦ୍ୟାଳୟରେ କଳାର ସ୍ନାତକ ପାଇଁ ଯୋଗ ଦେଇଥିଲେ ।

ପ୍ରଜ୍ଞା ୨୦୧୫ ମସିହାରେ ତରଙ୍ଗ ଟିଭିଦ୍ୱାରା ଆୟୋଜିତ କାର୍ଯ୍ୟକ୍ରମ ଭଏସ୍ ଅଫ୍ ଓଡ଼ିଶାର ୩ୟ ସଂସ୍କରଣରେ ଭାଗ ନେଇଥିଲେ । ଏହି ପ୍ରତିଯୋଗୀତାରେ ବିଚାରକ ଭାବରେ ଅଭିଜିତ ମିଶ୍ର, ବିଷ୍ଣୁମୋହନ କବି, ହ୍ୟୁମାନ ସାଗର, ନଭ୍ୟା ଯାଇତି ଆଦି କଣ୍ଠଶୀଳ୍ପୀମାନେ କାର୍ଯ୍ୟ କରିଥିଲେ । ଏହି ପ୍ରତିଯୋଗୀତାଟିରେ ପ୍ରଜ୍ଞା ବିଜୟୀ ହୋଇଥିଲେ ।

ଭଏସ୍ ଅଫ୍ ଓଡ଼ିଶାରେ ବିଜୟୀ ହେବାପରେ ପ୍ରଜ୍ଞାଙ୍କୁ ଓଡ଼ିଆ କଥାଚିତ୍ର ଜଗତରେ କଣ୍ଠଦାନ ପାଇଁ ସୁଯୋଗ ମିଳିଥିଲା । ତା' ସ‌ହିତ ସେ ଓଡ଼ିଶା ତ‌ଥା ଓଡ଼ିଶା ବାହାରେ ବିଭିନ୍ନ ମଞ୍ଚରେ ଗୀତ ଗାଉଛନ୍ତି । ପ୍ରଜ୍ଞା ଓଡ଼ିଆ କଥାଚିତ୍ର ବ୍ୟତୀତ ଓଡ଼ିଆ ଆଧୁନିକରେ ମଧ୍ୟ କଣ୍ଠଦାନ କରିଛନ୍ତି ।