ବାଳକୃଷ୍ଣ ନାୟକ ଓଡ଼ିଆ ଚଳଚ୍ଚିତ୍ର ଜଗତର ଜଣେ ହାସ୍ୟ କଳାକାର । ଓ ଟିଭିରେ ପ୍ରସାରିତ ହେଉଥିବା ରାଜନିତୀ ଭିତ୍ତିକ ହାସ୍ୟାତ୍ମକ କାର୍ଯ୍ୟକମ ଦି ଗ୍ରେଟ ଓଡ଼ିଶା ପଲିଟିକାଲ ସର୍କସରେ ବାଳକୃଷ୍ଣ ଜଣେ ବ୍ୟଙ୍ଗ ଅଭିନେତା ଭାବରେ ନିଜର ଅଭିନୟ ଜୀବନ ଆରମ୍ଭ କରିଥିଲେ । ଓଡ଼ିଆ କଥାଚିତ୍ର ଜଗତରେ ଚିଟ୍‌ଫଣ୍ଡ ଏବଂ କାଷ୍ଟିଂ କାଉଚକୁ ନେଇ ସଞ୍ଜୟ ନାୟକଙ୍କ ନିର୍ଦ୍ଦେଶିତ ଏକ୍ସକ୍ୟୁଜ ମି କ'ଣ କଲା ସେ ଚଳଚ୍ଚିତ୍ର ଜରିଆରେ ୨୦୧୬ ମସିହାରେ ବାଳକୃଷ୍ଣ ବଡ଼ ପରଦାରେ ନିଜର ଅଭିନୟ ଜୀବନ ଆରମ୍ଭ କରିଥିଲେ ।

ନୟାଗଡ଼ ଜିଲ୍ଲାର ଦଶପଲ୍ଲା ଗ୍ରାମରେ ଜନ୍ମଗ୍ରହଣ କରିଥିଲେ ବାଳକୃଷ୍ଣ । ଦଶପଲ୍ଲା ସରସ୍ୱତୀ ଶିଶୁ ବିଦ୍ୟା ମନ୍ଦିରରୁ ସେ ତାଙ୍କର ପାଠପଢ଼ା ଆରମ୍ଭ କରିଥିଲେ । ପରେ ପରେ ସେ ରାଜମୋହ‌ନ ଜୀଉ ଉଚ୍ଚ ବିଦ୍ୟାଳୟ, ଦଶପଲ୍ଲାରେ ପାଠ ପଢ଼ିଲେ । ସେଠାରେ ତାଙ୍କର ଜଣେ ସ‌ହପାଠୀ ବନ୍ଧୁଙ୍କ ସ‌ହ ମିଶି ସେ ଲକି ବ୍ରଦର୍ସଙ୍କ ପଢ଼ୁଥା ହସି ହସି ଗଡ଼ୁଥା ଶୀର୍ଷକରେ ଏକ ପୁସ୍ତକ ପ୍ରକାଶ କରିଥିଲେ, ଯାହାକି ପାଠକ ମ‌ହଲରେ ଅନେକ ପ୍ରଶଂସା ସାଉଣ୍ଟିଥିଲା ।

ବାଳକୃଷ୍ଣଙ୍କର ପିଲାବେଳୁ ହିଁ ଅଭିନୟରେ ରୂଚି ଥିଲା । ସେ ସ୍କୁଲରେ ପଢ଼ୁଥିବା ବେଳେ ଫେବୃଆରୀ ୨୦୧୦ରେ ଦି ଗ୍ରେଟ ଓଡ଼ିଶା ପଲିଟିକାଲ ସର୍କସରେ ଅଭିନୟ କରିବାର ସୁଯୋଗ ପାଇଥଲେ । ଏହି କାର୍ଯ୍ୟକ୍ରମରେ ଅଭିନୟ ହିଁ ତାଙ୍କୁ ସାରା ଓଡ଼ିଶାରେ ପରିଚିତ କରାଇଥିଲା । ଓଡ଼ିଆ କଥାଚିତ୍ର ଜଗତର ହାସ୍ୟ ଅଭିନେତା ପପୁ ପମ ପମଙ୍କୁ ସେ ତାଙ୍କର ପ୍ରେରଣାର ଉତ୍ସ ଭାବରେ ଗ୍ରହଣ କରିଥାନ୍ତି । ଟିଭିରୁ ସେ ସବୁବେଳେ ପପୁ ପମ ପମଙ୍କ ହସାଇବା ଶୈଳୀ ଓ କଥାକୁ ନିରୀକ୍ଷଣ କରି ତାଙ୍କ ଭିତରେ ଥିବା ହସାଇବାର କଳାକୁ ଶାଣିତ କରିଛନ୍ତି । ଭାରତର ଅନ୍ୟ ଜଣେ ଜଣାଶୁଣା ହାସ୍ୟ ଅଭିନେତା କପିଲ ଶର୍ମାଙ୍କ କମେଡ଼ି କାର୍ଯ୍ୟକ୍ରମରୁ ମଧ୍ୟ ସେ ଅନେକ କିଛି ଶିକ୍ଷା କରିଛନ୍ତି ।