ଆଶୁତୋଷ ମହାପାତ୍ର (Ashutosh Mohapatra) ଜଣେ ଓଡ଼ିଆ ଯାତ୍ରା ଜଗତର ନାଟ୍ୟକାର ତ‌ଥା ନିର୍ଦ୍ଦେଶକ ଏବଂ ଓଡ଼ିଆ ଦୂରଦର୍ଶନ ଅଭିନେତା । ସେ ଯାତ୍ରା ଜଗତରେ ଇଂ ଆଶୁତୋଷ ମହାପାତ୍ର ଭାବରେ ପରିଚିତ । ଆଶୁତୋଷ ଓଡ଼ିଆ ଯାତ୍ରା ଜଗତରେ ଶିବାନୀ, ତାରିଣୀ, ବାଘାଯତୀନ, କୋଣାର୍କ ଆଦି ବିଭିନ୍ନ ଯାତ୍ରାପାର୍ଟି ପାଇଁ ନାଟକ ଲେଖିଛନ୍ତି ଏବଂ ନିର୍ଦ୍ଦେଶନା ଦେଇଛନ୍ତି । ସେ ଯାତ୍ରା ଜଗତ ବ୍ୟତୀତ ଓଡ଼ିଆ ଦୂରଦର୍ଶନର କିଛି ଧାରାବାହିକରେ ଅଭିନୟ କରିଛନ୍ତି । ଇ ଟିଭି ଓଡ଼ିଆରେ ପ୍ରସାରିତ ଧାରାବାହିକ ଗାୟତ୍ରୀରେ ଆଶୁତୋଷଙ୍କର ଅଭିନୟ ତାଙ୍କୁ ଦର୍ଶକଙ୍କ ପାଖରେ ଅଧିକ ପରଚିତ କରିଥିଲା ।

ଆଶୁତୋଷ ମହାପାତ୍ର ଓଡ଼ିଆ ଯାତ୍ରା ଜଗତର ପୁରାତନ ନାଟ୍ୟକାର କିଶୋର ମହାପାତ୍ରଙ୍କର ପୁଅ । ଆଶୁତୋଷ ପିଲାଦିନରୁ ନାଟକ ରଚନା କରିବାକୁ ମନ ବଳାଇଥିଲେ, ମାତ୍ର ତାଙ୍କ ବାପା ତାଙ୍କୁ ଜଣେ ଇଞ୍ଜିନିୟର କରିବାର ଲକ୍ଷ୍ୟ ରଖିଥିଲେ ।

ଆଶୁତୋଷ ଓଡ଼ିଆ ଯାତ୍ରା ଜଗତ ପାଇଁ ବିଭିନ୍ନ ନାଟକ ରଚନା କରିଛନ୍ତି ଏବଂ ଅନେକ ନାଟକର ନିର୍ଦ୍ଦେଶନା ଦେଇଛନ୍ତି । ଆଶୁତୋଷ ପ୍ରଥମେ ଗୌରୀ ଗଣନାଟ୍ୟ ପାଇଁ 'ଚାରି ଛକରେ ତିନି ଝିଅ'ର ନିର୍ଦ୍ଦେଶନା ଦେଇଥିଲେ ଏବଂ ସେ ଏହି ନାଟକଟି ନିଜେ ରଚନା କରିଥିଲେ । ଏହି ନାଟକଟି ଖଣ୍ଡଗିରି ଯାତ୍ରାମେଳାରେ ଲାଗାତାର ୬ ରାତି ଚାଲିଥିଲା ଏବଂ ଇତିହାସ ସୃଷ୍ଟି କରିଥିଲା ।

ଶିବାନୀ ଗଣନାଟ୍ୟ ପାଇଁ ସେ ଡଃ ସୁଧାଂଶୁ ନାୟକଙ୍କର ରଚିତ ନାଟକ 'ହାତୀ ନାହିଁ କି ଘୋଡ଼ା ନାହିଁ'ର ନିର୍ଦ୍ଦେଶନା ଦେଉଛନ୍ତି । ନୂଆ କରି ଆରମ୍ଭ ହେବାକୁ ଯାଉଥିବା ଯାତ୍ରାପାର୍ଟି "ଇନ୍ଦ୍ରମହଲ" ପାଇଁ ଆଶୁତୋଷ ନିଜେ ନାଟକ ରଚନା କରିବା ସ‌ହ ଏହାର ନିର୍ଦ୍ଦେଶନା ଦେଉଛନ୍ତି । ଏହି ନାଟକଟିର ଶୀର୍ଷକ ରଖିଛନ୍ତି "ବାସନ୍ତୀ ଭାଉଜ ଭାରି ଖରାପ" ।

ଆଶୁତୋଷ ପୂର୍ବରୁ ବାଜିବଲୋ ସାହାନାଇ, ଅର୍ଦ୍ଧାଙ୍ଗିନୀ, ବଳାତ୍କାର, ଷ୍ଟେସନ କୁଲି ଆଦି ଚର୍ଚ୍ଚିତ ନାଟକର ନିର୍ଦ୍ଦେଶନା ଦେଇଥିଲେ ।

ଆଶୁତୋଷ ମହାପାତ୍ର ଓଡ଼ିଆ ଦୂରଦର୍ଶନ ଧାରାବାହିକରେ ଅଭିନୟ କରିଥିଲେ । ଇ ଟିଭି ଓଡ଼ିଆରେ ପ୍ରସାରିତ ଧାରାବାହିକ ଗାୟତ୍ରୀରେ ସେ ଅଭିନୟ କରିଥିଲେ । ଏହି ଧାରାବାହିକଟିରେ ତାଙ୍କର ଅଭିନୟ ଆଶୁତୋଷଙ୍କୁ ଅଧିକ ଲୋକପ୍ରିୟତା ଦେଇଥିଲା । ସେ ମୁଠାଏ ସପନ, ଭାଗ୍ୟ ବିଧାତା, ମାଉସୀ ଆଦି ଧାରାବାହିକରେ ଅଭିନୟ କରିଥିଲେ ।