ଆମେଲି ପଣ୍ଡା, ଜଣେ ଓଡ଼ିଆ ଆଲ୍‌ବମ୍ ଏବଂ କଥାଚିତ୍ର ଅଭିନେତ୍ରୀ । ସେ ପ୍ରଥମେ ଓଡ଼ିଆ ଆଲବମ୍‌ରେ ଅଭିନୟ କରିଥିଲେ । ଏହା ପରେ ପରେ ସେ ୨୦୦୫ରେ ସେ ରାଜୁ ମିଶ୍ରଙ୍କ ଚଳଚ୍ଚିତ୍ର ଜୀବନ ମୃତ୍ୟୁ ଜରିଆରେ ଓଡ଼ିଆ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ । ସେ ୨୦୦୭ରେ ତୁମକୁ ପାରୁନି ତ ଭୁଲି ଏବଂ ୨୦୧୦ରେ ଭୁଲ୍ ବୁଝିବନି ମତେ କଥାଚିତ୍ରରେ ଅଭିନୟ କରିଥିଲେ । ତାଙ୍କର ବିବା‌ହ ପରେ ସେ ଅଭିନୟ ଜଗତରୁ ଦୂରେଇ ଯାଇଥିଲେ ।

ଆମେଲି ପଶ୍ଚିମ ବଙ୍ଗର ଝାରଗ୍ରାମରେ ଜନ୍ମଗ୍ରହଣ କରିଥିଲେ । ତାଙ୍କର ଜଣେ ଭଉଣୀ ମଧ୍ୟ ଅଛନ୍ତି । ସେ ମହର୍ଷି ମହାବିଦ୍ୟାଳୟରୁ ପାଠ ପଢ଼ୁଥିଲେ । ଏହାପରେ ସେ ଓଡ଼ିଆ ଆଲବମ୍ ଜଗତରେ ଅଭିନୟ ଆରମ୍ଭ କରିଥିଲେ । ୧୧ ଡିସେମ୍ବର ୨୦୧୧ରେ ସେ ନୀଲ୍ ହୋତାଙ୍କୁ ବିବାହ କରିଥିଲେ । ବିବାହ ପରେ ସେ ଅଭିନୟରୁ ଦୂରେଇ ଯାଇଥିଲେ ।

ଆମେଲି ପ୍ରଥମେ ଓଡ଼ିଆ ଆଲବମ୍ ଗୀତରେ ଅଭିନୟ କରିଥିଲେ । ସେ ୫୦୦ରୁ ଅଧିକ ଆଲବମ୍ ଗୀତରେ ଅଭିନୟ କରିବା ପରେ ୨୦୦୫ ମସିହାରେ ନିର୍ଦ୍ଦେଶକ ରାଜୁ ମିଶ୍ର ତାଙ୍କୁ ଜୀବନ ମୃତ୍ୟୁ ଚଳଚ୍ଚିତ୍ରରେ ନାୟିକା ଭାବରେ ଅଭିନୟ କରିବାର ପ୍ରଥମ ସୁଯୋଗ ଦେଇଥିଲେ । ଏହି ଚଳଚ୍ଚିତ୍ର ଜରିଆରେ ସେ ଓଡ଼ିଆ କଥାଚିତ୍ର ଜଗତରେ ପ୍ରବେଶ କରିଥିଲେ । ଏହି କଥାଚିତ୍ରରେ ଆମେଲୀଙ୍କ ସ‌ହ ସୁନୀଲ କୁମାର, ମିହିର ଦାସ, ମୁନା ଖାନ୍, ଅପରାଜିତା ମହାନ୍ତି, ଉତ୍ତମ ମହାନ୍ତି ଆଦି କଳାକାରମାନେ ଅଭିନୟ କରିଥିଲେ ।

ଏହାପରେ ୨୦୦୭ରେ ସେ ଚକ୍ରଧାର ସାହୁଙ୍କ ନିର୍ଦ୍ଦେଶିତ ଚଳଚ୍ଚିତ୍ର ତମକୁ ପାରୁନି ତ ଭୁଲିରେ ଅଭିନେତ୍ରୀ ଅନୁ ଚୌଧୁରୀଙ୍କ ଭଉଣୀ ଭୂମିକାରେ ଅଭିନୟ କରିଥିଲେ । ଏହି ଚଳଚ୍ଚିତ୍ରଟିର ନାୟକ ପୁଣିଥରେ ସୁନୀଲ କୁମାର ଥିଲେ । ମନୋଜ ମିଶ୍ର, ଉତ୍ତମ ମହାନ୍ତି, ଅଶୋକ ଦାସ ପ୍ରମୁଖ ଏହି ଚଳଚ୍ଚିତ୍ରରେ ଆମେଲୀଙ୍କ ସ‌ହ ଅଭିନୟ କରିଥିଲେ ।

୨୦୧୦ ମସିହାରେ ଆମେଲି ନିର୍ଦ୍ଦେଶକ କୁନାଲ ପଟ୍ଟନାୟକଙ୍କ ଚଳଚ୍ଚିତ୍ର ଭୁଲ୍ ବୁଝିବନି ମତେରେ ଅଭିନୟ କରିଥିଲେ । ଏହି କଥାଚିତ୍ରଟିରେ ନାୟକ ଥିଲେ ଦେବାଶିଷ ପାତ୍ର । ସମରେଶ ରାଉତରାୟ, ମିହିର ଦାସ, ପ୍ରିୟଙ୍କା, ପିଣ୍ଟୁ ନନ୍ଦ ଆଦି କଳାକାରମାନେ ଏହି ଚଳଚ୍ଚିତ୍ରଟିରେ ଅଭିନୟ କରିଥିଲେ । ଏହି ଚଳଚ୍ଚିତ୍ରଟି ଆମେଲିଙ୍କର ଶେଷ ଚଳଚ୍ଚିତ୍ର ଥିଲା । ଏହାପରେ ସେ ଓଡ଼ିଆ କଥାଚିତ୍ର ଜଗତରେ ଆଉ ଅଭିନୟ କରିନାହାନ୍ତି ।

ଆମେଲି 'ଧନ୍ୟ ତୁମେ ସାଇବାବା' ନାମକ ଏକ ଡକୁମେଣ୍ଟାରୀ ଚଳଚ୍ଚିତ୍ରରେ ଅଭିନୟ କରିଥିଲେ । ଏହି ଚଳଚ୍ଚିତ୍ରଟିର ନିର୍ଦ୍ଦେଶନା ଦେଇଥିଲେ ଆପୁ କାନୁନ୍‌ଗୋ । ଦେବୁ ବ୍ରହ୍ମା ଏହି ଚଳଚ୍ଚିତ୍ରଟିରେ ଆମେଲିଙ୍କ ସ‌ହ ଅଭିନୟ କରିଥିଲେ ।