ଅନୁଭା ସୌର୍ଯ୍ୟା(ଜନ୍ମ: ୧୬ ଜୁଲାଇ ୧୯୯୨, ଖୋର୍ଦ୍ଧା) ଜଣେ ଓଡ଼ିଆ କଥାଚିତ୍ର ଅଭିନେତ୍ରୀ । ସେ ଅଭିନେତ୍ରୀ ପୁଷ୍ପା ପଣ୍ଡାଙ୍କର ଝିଅ । ଅନୁଭା ୨୦୧୧ ମସିହାରେ ହରିହର ଦାସଙ୍କ ସ‌ହ ଓଡ଼ିଆ କଥାଚିତ୍ର ମୁଁ ପ୍ରେମୀ ମୁଁ ପାଗଳ ଚଳଚ୍ଚିତ୍ର ଜରିଆରେ ଓଡ଼ିଆ କଥାଚିତ୍ର ଜଗତରେ ପ୍ରଥମ ଅଭିନୟ ଆରମ୍ଭ କରିଥିଲେ । ଅନୁଭା ଓଡ଼ିଶୀ ନୃତ୍ୟଗୁରୁ ଗଙ୍ଗାଧର ପ୍ରଧାନଙ୍କ ଅଧିନରେ ଓଡ଼ିଶୀ ନୃତ୍ୟ ଶିକ୍ଷା କରିଥିଲେ । ସେ ଅନେକ ମଞ୍ଚରେ ଓଡ଼ିଶୀ ନୃତ୍ୟ ପ୍ରଦର୍ଶନ କରିଛନ୍ତି ।

ଅନୁଭା ସୌର୍ଯ୍ୟା ୧୯୯୨ ମସିହା ଜୁଲାଇ ୧୬ରେ ଜନ୍ମଗ୍ରହଣ କରିଥିଲେ । ତାଙ୍କର ବାପା ଲ‌ଲାଟେନ୍ଦୁ ନାରାୟଣ ଷଡ଼ଙ୍ଗୀ ଜଣେ ଇଞ୍ଜିନିୟର ଏବଂ ମାଆ ପୁଷ୍ପା ପଣ୍ଡା ଜଣେ ଓଡ଼ିଆ କଥାଚିତ୍ର ଅଭିନେତ୍ରୀ । ଅନୁଭାଙ୍କର ଗ୍ରାମ ଖୋର୍ଦ୍ଧାଜିଲ୍ଲାର ଏକ ପାହାଡ଼ପାଖ ରଣାପୁର ଗ୍ରାମରେ । ସେ ଚନ୍ଦ୍ରଶେଖରପୁରର ଡି.ଏ.ଭି ସ୍କୁଲରୁ ବିଦ୍ୟାଳୟ ଶିକ୍ଷାଗ୍ରହଣ କରିଥିଲେ ଏବଂ ପରେ ସେ ସିଲିକନ ବୈଷୟିକ ମହାବିଦ୍ୟାଳୟରୁ ଇଞ୍ଜିନିୟରିଂ କରିଛନ୍ତି ।

ଅନୁଭା ଜଣେ ଓଡ଼ିଶୀ ନର୍ତ୍ତକୀ । ସେ ଓଡ଼ିଶୀ ନୃତ୍ୟଗୁରୁ ଗଙ୍ଗାଧର ପ୍ରଧାନଙ୍କ ଅଧିନରେ ଓଡ଼ିଶୀ ନୃତ୍ୟ ଶିକ୍ଷା କରିଥିଲେ । ଛୋଟବେଳୁ ସେ ନୃତ୍ୟ ପ୍ରତି ଆଗ୍ରହୀ ଥିଲେ । ସେ ଛୋଟବେଳେ ଓଡ଼ିଆ ଗୀତ ମାଟି ଘୋଡ଼ା ଏବଂ ଆଖିର ଜନ୍ମରେ ଅଭିନୟ କରିଥିଲେ । ସେ କିଛି କାର୍ଯ୍ୟକ୍ରମରେ ଉପସ୍ଥାପିକା ଭାବରେ କାର୍ଯ୍ୟ କରିଥିଲେ ।

୨୦୧୧ ମସିହାରେ ଇଞ୍ଜିନିୟରିଂ କରୁଥିବା ବେଳେ ପ୍ରଥମ ଓଡ଼ିଆ ଚଳଚ୍ଚିତ୍ର ମୁଁ ପ୍ରେମୀ ମୁଁ ପାଗଳରେ ସେ ଅଭିନୟ କରିବାର ପ୍ରଥମ ସୁଯୋଗ ପାଇଥିଲେ । ଇଣ୍ଡିଆଜ୍ ଗଟ୍ ଟ୍ୟାଲେଣ୍ଟର ଫାଇନାଲରେ ପ‌ହଞ୍ଚିଥିବା ହରିହର ଦାସ ମଧ୍ୟ ଅନୁଭାଙ୍କ ସ‌ହ ସେହି ଚଳଚ୍ଚିତ୍ରରେ ପ୍ରଥମ କରି ନାୟକ ଭାବରେ ଅଭିନୟ କରିଥିଲେ । ୨୦୧୫ ମସିହାରେ ହିନ୍ଦୀ କଥାଚିତ୍ର କୌନ୍ କିତ୍‌ନେ ପାନିମେରେ ରାଜକୁମାରୀ ଭୂମିକାରେ ଅଭିନୟ କରିଥିଲେ । ଏହି ଚଳଚ୍ଚିତ୍ର ଜରିଆରେ ସେ ହିନ୍ଦୀ କଥାଚିତ୍ର ଜଗତରେ ଅଭିନୟ ଆରମ୍ଭ କରିଥିଲେ ।

ଏହି ଚଳଚ୍ଚିତ୍ରରେ ମୁକ୍ତିଲାଭ ପରେ ସେ ତାଙ୍କ ପାଠପଢ଼ାରେ ବ୍ୟସ୍ତ ରହିଲେ ଏବଂ ୫ ବର୍ଷ ଯାଏଁ କୌଣସି ଚଳଚ୍ଚିତ୍ରରେ ଅଭିନୟ କରିନଥିଲେ । ୨୦୧୬ ମସିହାରେ ଅନୁଭାଙ୍କ ଅଭିନୀତ ତିନୋଟି ଚଳଚ୍ଚିତ୍ର ମୁକ୍ତିଲାଭ କରିଥିଲା । ଅଭିନେତା ପୁପିନ୍ଦର ଏବଂ ଲିପ୍ସା ମିଶ୍ରଙ୍କ ଅନୁଭା ସମୟ ବଡ଼ ବଳବାନ ଚଳଚ୍ଚିତ୍ରରେ ଅଭିନୟ କରିଥିଲେ । ଅଭିନେତା ବାବୁଶାନ୍ ଏବଂ ଅନୁ ଚୌଧୁରୀଙ୍କ ସ‌ହ ଅନୁଭାଙ୍କର ଅନ୍ୟ ଏକ ଚଳଚ୍ଚିତ୍ର ସୁଇଟ୍ ହାର୍ଟ ୨୦୧୬ରେ ମୁକ୍ତିଲାଭ କରିଥିଲା । ଅସୀତ ପତିଙ୍କ ପ୍ରଯୋଜିତ କଥାଚିତ୍ର ରିଭେଞ୍ଜରେ ଅନୁଭା ନାୟକ ଅଭିଶେକ ରଥଙ୍କ ଅଭିନୟ କରିଥିଲେ ।

ଅନୁଭା ସାର୍ଥକ ଟିଭିଦ୍ୱାରା ଆୟୋଜିତ କାର୍ଯ୍ୟକ୍ରମ ରଜ କୁଇନ୍‌ର ୨୦୧୬ ସଂସ୍କରଣରେ ଜଣେ ଉପଦେଷ୍ଟା ଭାବରେ ଜିନା ସାମଲ, ପ୍ରିୟା ଚୌଧୁରୀ ଏବଂ ପ୍ରକୃତି ମିଶ୍ର ସ‌ହ କାର୍ଯ୍ୟ କରିଥିଲେ ।